مصنف:رانا امیر احمد خاں

قسط:111

میرے نزدیک اپنے تعلیمی ادارے کی حد تک،سٹوڈنٹ یونین کی شکل میں تعلیمی، تفریحی، ثقافتی سرگرمیاں جاری رکھنے کا طلبہ کو پورا پورا حق ملنا چاہئے لیکن تعلیم کے دوران عملی طور پر سیاسی کام جاری رکھنے کی اجازت نہیں ہونی چاہئے۔ طلباء سیاست دانوں کے آلۂ کار بن کر تعلیمی اداروں میں امنِ عامہ کے مسائل پیدا کرتے ہیں جس کی اجازت نہیں دی جانی چاہئے۔ اگر کوئی طالب علم تعلیم کی بجائے سیاست ہی کرنا چاہتا ہے تو ایسے طالب علم کو اپنی سیاسی جماعتوں کے پلیٹ فارم سے سیاست کا آغاز کرنا چاہئے نہ کہ تعلیمی اداروں سے میں نے اس ضمن میں ڈاکٹر منیر الدین چغتائی وائس چانسلر پنجاب یونیورسٹی سے ملاقات کی۔

پاکستان یوتھ موومنٹ کی جانب سے سینٹ ہال پنجاب یونیورسٹی میں ایک سیمینار کا بھی اہتمام کیا جس میں ڈاکٹر منیر الدین چغتائی خود بھی بطور مہمانِ خصوصی شریک ہوئے۔ پنجاب یونیورسٹی کی طالبہ انیلا چودھری نے اس سیمینار کی کامیابی میں اہم کردار ادا کیا۔ اس سیمینار میں یونیورسٹی شعبہ جات کے طلباء اور پاکستان یوتھ موومنٹ کے کارکنان نے شرکت کی۔ تعلیمی اداروں سے سیاسی جماعتوں کی ذیلی شاخیں ختم کروانے کے ضمن میں میں وزیر اعلیٰ پنجاب غلام حیدر وائیں اور جماعتِ اسلامی پاکستان کے امیر قاضی حسین احمد سے بھی ملا اور اْن سے بڑے ادب سے گزارش کی کہ آخر آپ تعلیمی اداروں کا ماحول کیوں خراب کرنے پر تْلے ہوئے ہیں۔ غلام حیدر وائیں وزیر اعلیٰ پنجاب نے میرے سامنے مسلم سٹوڈنٹس فیڈریشن کی پرانی تاریخ اور تحریک پاکستان میں مسلم سٹوڈنٹس فیڈریشن کے فعال کردار پر روشنی ڈالی اور مجھے کہا کہ وہ اس نام اور اس ادارے کو ختم نہیں کر سکتے جبکہ قاضی حسین احمد نے مجھے ایک ہی بات کی کہ آپ وائیں صاحب کو منا لیں تو وہ بھی جمعیت کو ختم کرنے کے لئے تیار ہونگے۔ ایک دوسرے کی ضد میں سیاستدانوں کا ایک منفی سرگرمی کو تعلیمی اداروں میں جاری رکھنے پر اِصرار میری سمجھ سے بالا تر ہے۔ مجھے حیرت ہوتی ہے کہ ہمارے سیاست دان بالخصوص دونوں مذکورہ سیاست دان جن کا شمار اچھے سیاست دانوں میں ہوتا تھاوہ بھی اپنی پارٹی کے مفادات کے لئے قومی مفاد کو پسِ پشت ڈالتے رہے۔

ان دنوں نوجوانوں کا ایک دوسرا تعلیمی مسئلہ امتحانوں میں نقل بازی کی بھرمار کا ہونا تھا اور یہ وباء ہماری نوجوان نسل کے لئے زہرِ قاتل کی حیثیت رکھتی ہے۔ اس مسئلہ کے حل کی طرف توجہ مبذول کروانے کے لئے پاکستان یوتھ موومنٹ کی جانب سے میں نے سر فضل حسین تھیٹرگورنمنٹ کالج لاہور میں ایک مذاکرے کا اہتمام کیا۔ جس میں پرنسپل پروفیسر ڈاکٹر خالد آفتاب، اس وقت کے پنجاب کے وزیر تعلیم جناب عثمان ابراہیم اور مرکزی وزیر پاپولیشن پلاننگ رانا نذیر احمد خاں بطور مہمانِ خصوصی شامل ہوئے۔ سیمینار میں گورنمنٹ کالج لاہور کے طلباء اور کارکنان یوتھ موومنٹ بڑی تعداد میں شریک ہوئے اور امتحانات میں نقل بازی کے خاتمہ کے لئے سیرحاصل بحث میں حصہ لیا۔ مجھے خوشی ہے کہ اْس وقت کے وزیر تعلیم عثمان ابراہیم انصاری اور بورڈ ہائے تعلیم اور پنجاب حکومت نے اس مسئلہ کے حل کے لئے کافی جان فشانی سے کام کیا اور اس وباء پر کافی حد تک قابو پا لیا گیا۔

(جاری ہے)

نوٹ: یہ کتاب ”بک ہوم“ نے شائع کی ہے (جملہ حقوق محفوظ ہیں)ادارے کا مصنف کی آراء سے متفق ہونا ضروری نہیں۔