لاہور (ڈیلی پاکستان آن لائن) وزیر اطلاعات پنجاب عظمٰی بخاری نے کہا ہے کہ پنجاب کی تاریخ میں پہلی بار پنجابی کلچر ڈے شاندار طریقے سے منایا جا رہا ہے۔ پنجاب کا کلچر اب یتیم نہیں رہا اس کو سنبھالنے والے آگئے ہیں۔قائد مسلم لیگ (ن) میاں نواز شریف خود فنکاروں کے ساتھ براہ راست رابطے میں ہیں۔ وزیر اعلی پنجاب، پنجاب کے فنکاروں کےلیے ایک الگ ہاؤسنگ کالونی بنانا چاہتی ہیں۔

انہوں نے کہا کہ پنجاب کی تاریخ میں پہلی مرتبہ، پنجابی کلچر ڈے کو سرکاری سطح پر شان و شوکت سے منایا جا رہا ہے، جس کا باضابطہ آغاز وزیر اعلیٰ پنجاب کی خصوصی ہدایت پر کیا گیا۔ یہ فیسٹیول 3 روز تک جاری رہے گا، جو شام 7 بجے سے رات 10 بجے تک الحمرا ءآرٹس کونسل لاہور میں ہوگا۔فیسٹیول میں پنجاب بھر سے شہری اپنی فیملیز کے ہمراہ شرکت کر رہے ہیں، جہاں ہر روز پنجابی فنکار اپنی ثقافتی صلاحیتوں کا مظاہرہ کر رہے ہیں۔

عظمٰی بخاری نے بتایا کہ وزیر اعلیٰ پنجاب کا ویژن ہے کہ فنکاروں کی فلاح و بہبود کے لیے عملی اقدامات کیے جائیں، جن میں فنکاروں کے لیے ہاؤسنگ کالونی کی تجویز بھی شامل ہے۔وزیر اعلیٰ پنجاب کی فیسٹیول میں شرکت اس بات کا پیغام ہے کہ پنجاب کا کلچر اب یتیم نہیں رہا۔ ہم نے اس ورثے کو سنبھالنے اور آگے بڑھانے کا عزم کیا ہے۔ یہ فیسٹیول نہ صرف پنجاب کی ثقافت کو اجاگر کر رہا ہے بلکہ نوجوان نسل کو اپنے ورثے سے جوڑنے کا ذریعہ بھی بن رہا ہے۔