سورس: The White House

واشنگٹن (ڈیلی پاکستان آن لائن) امریکہ کے صدر ڈونلڈ ٹرمپ اور ٹیکنالوجی کے ارب پتی ایلون مسک کے درمیان تعلقات میں واضح دراڑ سامنے آ گئی ہے۔ ٹرمپ نے وائٹ ہاؤس میں صحافیوں سے گفتگو کرتے ہوئے کہا کہ وہ ایلون مسک سے "بہت مایوس" ہیں۔ انہوں نے تسلیم کیا کہ دونوں کے درمیان خوشگوار تعلق رہا ہے، مگر اب یہ تعلق برقرار رہنا مشکل نظر آتا ہے۔

یہ بیان اُس وقت سامنے آیا جب مسک نے ٹرمپ کے منظور کردہ نئے ٹیکس اور اخراجاتی بل کو شدید تنقید کا نشانہ بنایا۔ مسک، جو حال ہی میں وائٹ ہاؤس کے مشاورتی کردار سے مستعفی ہوئے تھے، نے اس قانون سازی کو "نفرت انگیز بل" قرار دیا اور کہا کہ اس میں غیر ضروری اخراجات کا انبار لگا ہوا ہے۔

خیال رہے کہ ایلون مسک ٹرمپ کے قریبی اتحادی تھے۔ ٹرمپ کے صدر بننے کے بعد انہیں حکومتی اخراجات کم کرنے والے محکمے ڈوج کا سربراہ بنایا گیا تھا۔ 31 مئی کو انہوں نے حکومتی کردار سے علیحدگی اختیار کی تو ٹرمپ نے انہیں ان کی خدمات کے عوض وائٹ ہاؤس کی گولڈن چابی تحفے میں دی تھی۔ لیکن تین سے چار دنوں میں ہی پرانے اتحادی باہم دست و گریباں ہو چکے ہیں۔