سورس: NeedPix

ایڈنبرا (ڈیلی پاکستان آن لائن) سکاٹ لینڈ میں پولیس نے منشیات فروشوں کے ایک بڑے نیٹ ورک کا پردہ فاش کرتے ہوئے ایک کارروائی میں بدنام زمانہ ڈرگ ڈیلر کی ماں کو رنگے ہاتھوں پکڑ لیا۔ پولیس کے چھاپے کے دوران گیلیئن میلوِل ایک بستر پر بیٹھی ہوئی تھیں اور ان کے پاس بھاری رقم کے نوٹوں کے ڈھیر لگے ہوئے تھے۔ حکام کا کہنا ہے کہ یہ کارروائی ان کے بیٹے ایلن کاؤزر کے منشیات کے وسیع نیٹ ورک کے ایک چھوٹے سے حصے کو ہی بے نقاب کر سکی ہے۔

نیشنل کرائم ایجنسی (این سی اے) کی تحقیقات کے مطابق ایلن کاؤزر ایک منظم جرائم پیشہ گروہ کا سرغنہ تھا جو ملک بھر میں سینکڑوں کلوگرام ہیروئن اور کوکین کی ترسیل میں ملوث تھا۔ استغاثہ کے وکلا نے لیورپول کراؤن کورٹ کو بتایا کہ کاؤزر نے اپنے مجرمانہ کاروبار سے تقریباً 11.18 ملین پاؤنڈز کمائے۔ حکام نے جرائم سے حاصل ہونے والی رقم واپس لینے کے لیے عدالت سے رجوع کیا ہے۔

کاؤزر نے پولیس کے سوالات کے جواب دینے سے انکار کیا جبکہ اس کی ماں نے کہا کہ ضبط کی گئی رقم میں سے صرف چھ ہزار پاؤنڈز اس کے ہینڈ بیگ میں اور 11 ہزار 400 پاؤنڈز ایک اور تھیلے میں اس کی ذاتی بچت تھی۔ عدالت نے کیس کا فیصلہ سناتے ہوئے ایان شیکلیڈی کو 10 سال چھ ماہ قید، جان جرمین کو 11 سال آٹھ ماہ، ایلن کاؤزر کو 18 سال، ڈینیئل ہیلی کو 15 سال تین ماہ، جبکہ گیلیئن میلوِل کو 23 ماہ قید کی سزا سنائی۔