سورس: Picryl

ریاض (ڈیلی پاکستان آن لائن)سعودی عرب نے TOURISE کے نام سے ایک عالمی سیاحتی پلیٹ فارم کا آغاز کیا ہے جو آئندہ 50 برسوں کے لیے سیاحت کے میدان میں رہنمائی فراہم کرے گا۔ یہ اقدام ایسے وقت میں سامنے آیا ہے جب سعودی عرب نے اپنا ویژن 2030 کا ہدف، یعنی سالانہ 10 کروڑ سیاح، مقررہ وقت سے پہلے ہی حاصل کر لیا ہے۔

سرکاری اعداد و شمار کے مطابق سیاحت اب سعودی معیشت میں تیل کے بعد سب سے بڑا شعبہ ہے جو ملک کی کل پیداوار کا تقریباً پانچ فیصد بنتا ہے، حالانکہ یہاں 2019 سے پہلے وسیع پیمانے پر سیاحتی ویزے جاری نہیں کیے جاتے تھے۔

العربیہ کے مطابق TOURISE پلیٹ فارم میں دنیا بھر کی بڑی کمپنیوں کے ماہرین شامل ہوں گے اور اس کا مقصد عالمی سرمایہ کاری کو راغب کرنا اور سیاحت کے شعبے میں جدید رجحانات، مصنوعی ذہانت، پائیداری، اور کاروباری ماڈلز پر توجہ دینا ہے۔ اس کا پہلا عالمی اجلاس نومبر 2025 میں ریاض میں منعقد ہوگا۔

یہ نیا قدم سعودی ولی عہد محمد بن سلمان کے معاشی تنوع کے منصوبے کا اہم حصہ ہے، جو تیل پر انحصار کم کر کے سیاحت، ثقافت، اور دیگر شعبوں کو فروغ دینے پر مبنی ہے۔