سورس: Facebook/neprapakistan

اسلا م آباد(آئی این پی) نیپرا نے کے الیکٹرک کی کارکردگی پرسخت تنقید کرتے ہوئے ادارے سے کراچی میں بجلی کے بحران پر سخت بازپرس کی ہے۔

عوامی سماعت کے دوران کراچی کے رہائشیوں، صنعتکاروں اور تاجروں نے کے الیکٹرک (KE) کی ناقص کارکردگی پربرہمی کا اظہار کرتے ہوئے ادارے پرسردیوں کے حکومتی ریلیف پیکج کوناکام بنانے کاالزام لگایا اور کہا کہ کمپنی صنعتی اور تجارتی علاقوں کو قابل اعتماد بجلی فراہم کرنے میں ناکام رہی ہے۔کارروائی کے دوران ایک موقع پر جنریشن لائسنس کی منسوخی کی تجویز بھی زیرغور آئی۔

شرکا نے کہا کہ کے الیکٹرک مسلسل لوڈشیڈنگ وفاقی حکومت کے سردیوں کے ریلیف پیکیج کو ناکام بنا رہی ہے، جس کی وجہ سے کاروباری پیداوار اور تجارتی سرگرمیوں میں اضافہ نہیں ہو پا رہا۔نیشنل الیکٹرک پاور ریگولیٹری اتھارٹی (نیپرا) نے بھی کے الیکٹرک پر تنقید کرتے ہوئے کہا کہ کمپنی نیشنل ٹرانسمیشن اینڈ ڈسپیچ کمپنی (NTDC) پر 67 فیصد بجلی کی فراہمی کے لیے انحصار کرتی ہے۔ نیپرا کے خیبرپختونخوا کے رکن مقصود انور نے کے الیکٹرک کے جنریشن لائسنس کو منسوخ کرنے کی تجویز دی۔