راولپنڈی(ڈیلی پاکستان آن لائن)تحریک انصاف کے چیئرمین بیرسٹر گوہر نے کہا ہے کہ آج اڈیالہ جیل میں ہم سب منتظر تھے کہ 11بجے فیصلہ سنایا جائے گا، یہاں پتہ چلا کہ فیصلے کا اعلان پھر مؤخر کردیا گیا ہے، 190ملین پاؤنڈ کیس کا فیصلہ نہ آنا کسی ڈیل کا نتیجہ نہیں۔

چیئرمین تحریک انصاف بیرسٹر گوہر نے اڈیالہ جیل کے باہر میڈیا سے گفتگو کرتے ہوئے کہاکہ ہمیں فیصلے کا وقت 11بجے کا دیا گیا تھااور ہم اسی حساب سے آئے ہیں،ہم تو تیار تھے کہ فیصلہ آج سنایا جائے گا، ہمارے ساتھ ناانصافی ہوتی رہی ہے،ہمارے ساتھ ٹرائل کورٹس کا رویہ غیرمساوی رہا ہے.ان کاکہناتھا کہ بانی پی ٹی آئی پر دباؤ ڈالنے کیلئے بشریٰ بی بی کا نام بھی القادر کیس میں شامل کیا گیا ہے،القادر کیس سیاسی طور پر بنایا گیا ہے،القادر ٹرسٹ کیس کا مقصد بانی پی ٹی آئی کو زیر کرنا ہے،بانی پی ٹی آئی ڈٹے رہیں گے، انہیں کیسز کی پرواہ نہیں، بشریٰ بی بی اڈیالہ جیل پہنچ رہی ہیں،بانی پی ٹی آئی تو اڈیالہ جیل ہی میں موجود ہیں،بانی پی ٹی آئی کو جیل سے کورٹ تک لانا جیل انتظامیہ کا کام تھا، فیصلہ نہ آنا کسی ڈیل کا نتیجہ نہیں. ہمیں اعلیٰ عدلیہ سے امید ہے ہم اعلیٰ عدالت میں جائیں گے،جس طرح باقی کیسز ختم ہوئے یہ کیس بھی ختم ہوگا۔

سلمان اکرم راجہ نے کہاکہ تاثر غلط ہے کہ کوئی ڈیل ہوئی ہے،مذاکرات کا مقصد جمہوریت ہے،ہم ڈیل نہیں کررہے، ملک میں جمہوریت اور انصاف کیلئے مذاکرات کررہےہیں،مذاکرات کاعمل جاری ہے، سننے میں آ رہا ہے کہ تیسری نشست 15جنوری کوہوگی،مذاکرات اور اس مقدمے کا آپس میں کوئی تعلق نہیں۔