سورس: Screen Grab:X

نیویارک (ڈیلی پاکستان آن لائن) انٹرنیٹ پر غیرمعمولی اور دلچسپ واقعات کی کہانیاں اکثر وائرل ہو جاتی ہیں، اور حالیہ دنوں میں ایک ایسا ہی واقعہ سامنے آیا ہے۔ نیویارک پوسٹ کی رپورٹ کے مطابق لاسی ڈے نامی خاتون نے دیوار کے پیچھے عجیب آوازیں سنیں اور جب دیوار توڑی گئی تو انکشاف ہوا کہ ایک بلی اندر پھنسی ہوئی تھی۔

یہ حیرت انگیز واقعہ ایک ویڈیو میں قید کیا گیا جو ٹک ٹاک پر وائرل ہو گئی اور لاکھوں بار دیکھی جا چکی ہے۔ ویڈیو میں دیکھا جا سکتا ہے کہ لاسی ڈے اور چند افراد دیوار کے پلاسٹر بورڈ کو کاٹ رہے ہیں تاکہ آواز کے ذریعے شور کی حقیقت تک پہنچا جا سکے۔ جب دیوار کو ہٹایا گیا تو ایک سرمئی چیز نظر آئی جو پہلے تو دھول یا انسولیشن کا حصہ لگ رہی تھی، لیکن جب وہ ہلی تو پتا چلا کہ وہ ایک زندہ بلی ہے۔ ویڈیو میں موجود ایک شخص نے کہا "یہ سانس لے رہی ہے۔"

بلی مکمل طور پر پلاسٹر اور دھول میں ڈھکی ہوئی تھی۔ لاسی ڈے نے اسے آہستہ سے نکال کر اس کے بالوں کو سہلایا تاکہ وہ پرسکون ہو جائے۔ آخر میں بلی بظاہر محفوظ حالت میں دیوار سے باہر نکل آتی ہے۔ بلی کا مالک اب تک سامنے نہیں آیا، لیکن لاسی ڈے نے قیاس کیا کہ یہ بلی شاید ان کے پڑوسی "ٹیلر" کی ہو سکتی ہے۔

فیلائن بیہیویئر سلوشنز کے مطابق بلیوں کا یہ رویہ ان کے جنگلی اجداد سے وراثت میں ملا ہے جو شکاریوں سے بچنے اور اپنے بچوں کو محفوظ جگہوں پر پالنے کے لیے چھپتے تھے۔