ممبئی(ڈیلی پاکستان آن لائن ) بالی ووڈ اداکارہ شردھا کپور اور راج کمار راؤ کی سُپر ہٹ کامیڈی ہارر فلم ‘استری 2′ نے باکس آفس پرکمائی کی دوڑ میں سُپر اسٹار پرابھاس کی فلم ‘باہو بلی 2′ کو پیچھے چھوڑ دیا ہے۔

تفصیلات کے مطابق 15اگست کو ریلیز ہونے والی فلم ‘استری 2′ نے اپنی ریلیز کے پہلے دن سے ہی باکس آفس پر دھوم مچائی ہے، دُنیا بھر سے کروڑوں کا بزنس کرنے والی اس فلم نے حال ہی میں ایک اور بڑا کارنامہ سرانجام دیا ہے۔شردھا کپور اور راج کمار راؤ کی ‘استری 2′ نے بھارتی فلم انڈسٹری کی تاریخ میں ریکارڈ توڑ کامیابی حاصل کرتے ہوئے پرابھاس کی بلاک بسٹر فلم ‘باہو بلی 2′ کو شکست دے دی ہے، صرف یہی نہیں ‘استری 2′ سب سے زیادہ کمائی کرنے والی تیسری ہندی فلم بھی بن گئی ہے۔

واضح رہے کہ شردھا کپور اور راج کمار راؤ کے علاوہ، فلم کی دیگر کاسٹ میں ابھیشیک بنرجی، اپارشکتی کھرانہ اور پنکج ترپاٹھی بھی شامل ہیں جبکہ ورون دھون، اکشے کمار اور تمنا بھاٹیہ نے فلم میں مہمان اداکار کے طور پر شرکت کی۔